Mon-Poeme.com

Pere divin, sapience eternelle,

Commencement et fin de toute chose,

Ou en pourtrait indeleble repose

De l'Univers l'Idee universelle.



Voy de tes Raiz la plus belle estincelle

Qui soit ça-bas en corps humain enclose,

Que la trop fiere, impiteuse Parque ose

Tirer du clos de sa cendre mortelle.



Donq de mon feu pourra la flame claire,

Qui à vertu heureusement m'esclaire,

Me delaisser en tenebreuse plainte ?



Ah non : plustot pleuve la cruauté

Du Ciel sur moy, que voir celle clarté

De mon Soleil avant son soir esteinte.