Mon-Poeme.com

Si je la voy pres d'un ruisseau coulant,

Elle me semble une belle Naiade :

Elle me semble une belle Driade,

Si je la voy l'herbe des prez foulant.



Si je la voy par les hautz lieus allant,

Je pense voir une vraye Oreade :

Et la compare à quelque Hamadriade,

Lors qu'au jardin ses beautez va çellant.



Que diray plus ? certes je ne me trompe :

Car s'elle avoit l'arc, la trousse, et la trompe,

On la viendroit pour Diane choysir.



Diane, à qui les Nymphes font hommage :

Mais qui n'a point un si plaisant visage

Que ceste Vierge, où niche mon desir.